തിരുവനന്തപുരം: സാമൂഹിക സുരക്ഷ, ക്ഷേമനിധി പെൻഷനുകളുടെ ഗുണഭോക്താക്കൾക്ക് സർക്കാർ ഒരു ഗഡു പെൻഷൻ അനുവദിച്ചു. ക്രിസ്മസ് പ്രമാണിച്ച് 62 ലക്ഷം പേർക്ക് 1600 രൂപ വീതം ലഭിക്കും. തിങ്കളാഴ്ച മുതൽ തുക പെൻഷൻകാർക്ക് എത്തിത്തുടങ്ങുമെന്ന് ധനമന്ത്രി കെ എൻ ബാലഗോപാൽ അറിയിച്ചു.
ഏകദേശം 27 ലക്ഷം പേർക്ക് അവരുടെ ബാങ്ക് അക്കൗണ്ടുകളിലേക്ക് നേരിട്ട് പെൻഷൻ ലഭിക്കും, മറ്റുള്ളവർക്ക് അവരുടെ പെൻഷൻ സഹകരണ ബാങ്കുകൾ വഴി വീടുകളിൽ എത്തിക്കും. കഴിഞ്ഞ മാർച്ച് മുതലാണ് സർക്കാർ പ്രതിമാസ പെൻഷൻ വിതരണം ഉറപ്പാക്കിയത്. ഈ സർക്കാർ അധികാരത്തിൽ വന്നതിന് ശേഷം ഏകദേശം 33,800 കോടി രൂപയാണ് ക്ഷേമ പെൻഷനുകൾക്കായി അനുവദിച്ചത്. ഇന്ത്യയിൽ ഏറ്റവും സമഗ്രമായ സാമൂഹിക സുരക്ഷാ പെൻഷൻ പദ്ധതി നടപ്പാക്കിയ സംസ്ഥാനമാണ് കേരളം.
