ആലപ്പുഴ: മാന്നാർ ഇരമത്തൂരിൽ കാണാതായ കല കൊല്ലപ്പെട്ടുവെന്ന് സ്ഥിരീകരിച്ചതോടെ കലയുടെ ഭർത്താവ് ഇരമത്തൂർ സ്വദേശി അനിൽ കുമാറിനെ നാട്ടിലെത്തിക്കാൻ ശ്രമം തുടങ്ങി പോലീസ്. ഇസ്രായേലിൽ ജോലിചെയ്യുന്ന അനിൽ കുമാറിനെ പോലീസിന് ബന്ധപ്പെടാനായിട്ടില്ലെന്ന് ആലപ്പുഴ എസ്പി ചൈത്രാ തെരേസാ ജോൺ അറിയിച്ചു. അനിൽ കുമാറിൻ്റെ ഇരമത്തൂരിലെ വീടിൻ്റെ സെപ്റ്റിക് ടാങ്കിൽ നടത്തിയ പരിശോധനയിലാണ് കലയുടേത് കൊലപാതകമെന്ന് സ്ഥിരീകരിക്കുന്ന നിർണായ തെളിവുകൾ പോലീസിന് ലഭിച്ചത്.
15 വർഷം മുൻപ് കാണാതായ കലയെ ഭർത്താവ് അനിൽ മർദിച്ച് കൊലപ്പെടുത്തിയെന്നാണ് പോലീസിൻ്റെ പ്രാഥമിക നിഗമനം. മൃതദേഹാവശിഷ്ടം എന്നു കരുതുന്ന വസ്തുക്കളാണ് അനിലിൻ്റെ വീട്ടിലെ സെപ്റ്റിക് ടാങ്കിൽനിന്ന് ലഭിച്ചത്. കലയുടെ മൃതദേഹം സെപ്റ്റിക് ടാങ്കിൽ തള്ളിയ ശേഷം തെളിവ് നശിപ്പിക്കാൻ പ്രതികൾ രാസവസ്തു ഉപയോഗിച്ചെന്ന സംശയവും പോലീസിനുണ്ട്. മൃതദേഹം സെപ്റ്റിക് ടാങ്കിൽ മറവ് ചെയ്യാൻ സഹായിച്ച അനിലിൻ്റെ ബന്ധുക്കളും സുഹൃത്തുക്കളുമടക്കം നാലുപേരെ പോലീസ് കസ്റ്റഡിയിലെടുത്തിട്ടുണ്ട്. ഇവരുടെ അറസ്റ്റ് ഉടൻ രേഖപ്പെടുത്തും.
അമ്പലപ്പുഴ പോലീസ് സ്റ്റേഷനിൽ ലഭിച്ച ഊമക്കത്ത് കേന്ദ്രീകരിച്ച് നടത്തിയ അന്വേഷണമാണ് വൻ വഴിത്തിരിവായത്. കല എന്ന യുവതിയെ മാന്നാറിൽ നിന്ന് കാണാതായെന്നും അവർ കൊല്ലപ്പെട്ടുവെന്നുമായിരുന്നു ഊമക്കത്തിലെ ഉള്ളടക്കം. എഫ്ഐആർ രജിസ്റ്റർ ചെയ്ത അമ്പലപ്പുഴ പോലീസ്, പിന്നീട് കേസ് മാന്നാർ പോലീസിന് കൈമാറുകയായിരുന്നു. പോലീസ് നടത്തിയ അന്വേഷണത്തിലാണ് കൊലയ്ക്ക് പിന്നിൽ യുവതിയുടെ ഭർത്താവ് അനിൽ കുമാറിന് പങ്കുണ്ടെന്ന സൂചന ലഭിച്ചത്. അനിൽ കുമാറിൻ്റെ ബന്ധുക്കളെയും സുഹൃത്തുക്കളെയും കസ്റ്റഡിയിലെടുത്ത് ചോദ്യംചെയ്തതോടെ ലഭിച്ച മൊഴികളുടെ അടിസ്ഥാനത്തിലാണ് സെപ്റ്റിക് ടാങ്ക് പരിശോധിക്കാൻ പോലീസ് തീരുമാനിച്ചത്.
ഇരമത്തൂരിലെ അനിലിൻ്റെ വീട്ടിലെ പഴയ രണ്ട് സെപ്റ്റിക് ടാങ്കുകളിലും എർത്ത് ടാങ്കിലുമാണ് പോലീസ് പരിശോധന നടത്തിയത്. രണ്ട് സെപ്റ്റിക് ടാങ്കുകളിൽ നിന്നാണ് മൃതദേഹാവശിഷ്ടം എന്നു കരുതുന്ന വസ്തുക്കൾ പോലീസിന് ലഭിച്ചത്. സെപ്റ്റിക് ടാങ്കുകളിൽനിന്ന് ഒരു ലോക്കറ്റ്, വസ്ത്രത്തിൻ്റെ കഷ്ണം, സ്ത്രീ ഉപയോഗിക്കുന്ന ക്ലിപ്പിൻ്റെ കഷ്ണം എന്നിവയും ലഭിച്ചതായി വിവരമുണ്ട്. ഇവ ഫൊറൻസിക് പരിശോധനയ്ക്ക് വിധേയമാക്കാനാണ് പോലീസ് തീരുമാനം. അതേസമയം 15 കൊല്ലം പഴക്കമുള്ള കേസായതിനാൽ ഫൊറൻസിക് തെളിവുകളും സാക്ഷിമൊഴികളും എടുക്കുന്നത് പോലീസിന് വെല്ലുവിളിയാണ്.
കൊലപാതകത്തിന് പിന്നിൽ വ്യക്തപരമായ കാരണങ്ങളാണെന്നാണ് പോലീസ് വ്യക്തമാക്കുന്നത്. കുടുംബത്തിന് സാമ്പത്തിക പ്രശ്നങ്ങളില്ലെന്ന് എസ് പി അറിയിച്ചു. നാട്ടിൽ കെട്ടിട നിർമാണ കരാറുകാരനായിരുന്ന അനിൽ കുമാർ ഇസ്രായേലിലേക്ക് പോയിട്ട് അധിക നാളായിട്ടില്ല. നേരത്തെ ദക്ഷിണാഫ്രിക്കയിലെ അംഗോളയിലും അനിൽ കുമാർ ജോലി ചെയ്തിട്ടുണ്ട്. കലയുമായുള്ള ബന്ധത്തിൽ അനിൽ കുമാറിന് ഒരു മകനുണ്ട്. കലയുടെ തിരോധാനത്തിന് ശേഷം നടന്ന വിവാഹത്തിൽ ഇയാൾക്ക് രണ്ട് മക്കളുണ്ട്.
അമ്പലപ്പുഴയിലെ പോലീസ് ടീമിനെ വെച്ചാണ് പ്രാഥമിക അന്വേഷണം നടത്തിയത്. കൊലപാതകത്തിന് എഫ്ഐആർ ഇട്ടശേഷം പ്രത്യേക അന്വേഷണ സംഘം രൂപീകരിച്ചിട്ടുണ്ടെന്നും ആലപ്പുഴ എസ്പി വാർത്താസമ്മേളനത്തിൽ അറിയിച്ചു.
