ആലപ്പുഴ: വിദേശ രാജ്യങ്ങളിലെ കപ്പലുകളിൽ ജോലി വാഗ്ദാനം ചെയ്ത് തട്ടിപ്പ് നടത്തിയ കേസിലെ പ്രതിയെ കേരളാ പോലീസ് പിടികൂടി.
മഹാരാഷ്ട്ര നാസിക്കിലെ ശ്രീറാംപൂർ സ്വദേശിയായ അനിൽ ഭഗവാൻ പഗാറെയാണ് ആലപ്പുഴ രാമങ്കരി പോലീസിന്റെ പിടിയിലായത്. നാസിക്കിൽ ഗ്ലോബൽ മൊബിലിറ്റി എന്ന സ്ഥാപനം നടത്തിവരുകയായിരുന്നു ഇയാൾ.
ജോലി വാഗ്ദാനം ചെയ്ത് പണം തട്ടിയെന്ന് രാമങ്കരി പോലീസ് സ്റ്റേഷനിൽ ലഭിച്ച പരാതിയെ തുടർന്നാണ് അനിൽ ഭഗവാൻ പഗാരെക്കെതിരെ പോലീസ് കേസെടുത്തത്. അന്വേഷണത്തിനൊടുവിൽ മഹാരാഷ്ട്രയിലെ നാസിക്കിലെ ശ്രീരാംപൂരിനടുത്തുള്ള പൊങ്കൽവസതി എന്ന സ്ഥലത്ത് വെച്ചാണ് രാമങ്കരി പോലീസ് അറസ്റ്റ് ചെയ്തത്. 2019 – 20 കാലഘട്ടത്തിൽ അനിൽ ഗോവയിൽ ജയിൽ ശിക്ഷ അനുഭവിച്ചിട്ടുള്ള ആളാണെന്ന് പോലീസ് പറഞ്ഞു.
വിദേശ രാജ്യങ്ങളിലെ കപ്പലുകളിലേക്ക് വിവിധ ജോലികൾക്കായി ആളുകളെ റിക്രൂട്ട് എന്ന് പറഞ്ഞ് പ്രതി നിരവധി യുവാക്കളിൽ നിന്നും പണം തട്ടിയെടുത്തിട്ടുണ്ടെന്ന് പോലീസ് അന്വേഷണത്തിൽ കണ്ടെത്തി.
