പത്തനംതിട്ടയില്‍ റേഷന്‍ വിതരണത്തിന് നിലവാരമില്ലാത്ത അരിയെത്തിച്ചു. അരിക്ക് നിറവ്യത്യാസമുണ്ടെന്നും വിതരണത്തിന് പറ്റുന്നതല്ലെന്നും ഉദ്യോഗസ്ഥര്‍ പറഞ്ഞിട്ടും തിരിച്ചെടുക്കാന്‍ കമ്പനി തയാറാകുന്നില്ല. പെരുമ്പാവൂരിലെ ജെബിഎസ് അഗ്രോ മില്ലിന്‍റേതാണ് അരി. 4340 ചാക്ക് അരിയുമായി 11 ലോറികളാണ് രണ്ടുദിവസമായി കാത്തുകിടക്കുന്നത്. കുലശേഖരപ്പേട്ടയിലെയും കോന്നിയിലേയും ഗോഡൗണുകൾക്ക് മുന്നിലാണ് ലോറികൾ കിടക്കുന്നത്. സ്ഥലപരിമിതി ഉള്ളതിനാൽ അരി ഇറക്കി വയ്ക്കാനും കഴിയില്ല.
രണ്ടുദിവസമായി കാത്ത് കിടന്ന് ലോറി ജീവനക്കാരും മടുത്തു. പരിശോധിച്ചു കയറ്റിയ ലോഡുകളാണ് എന്നാണ് ഇവർ പറയുന്നത്. ലോഡ് ഇറക്കാതെ വാടക ലഭിക്കില്ല. മറ്റു ജില്ലകളിലേക്കും നിലവാരമില്ലാത്ത അരി വിതരണം എത്തിയതായാണ് വിവരം.
