കോഴിക്കോട് :- കരിപ്പൂർ വിമാനത്താവളത്തിൽ യാത്രക്കാരൻ്റെ കയ്യിൽനിന്നും അടിവസ്ത്രത്തിൽ ഒളിപ്പിച്ചു കടത്താൻ ശ്രമിച്ച നിലയിൽ ഒരു കോടിരൂപ വിലവരുന്ന സ്വർണം കസ്റ്റംസ് പിടികൂടി.
1.04 കോടി രൂപ വിപണിയിൽ വിലവരുന്ന 890.35 ഗ്രാം തൂക്കമുള്ള 24 കാരറ്റ് സ്വർണമാണ് പിടിച്ചെടുത്തത്.
നൗഫൽ പുത്തൻകോട്ട് എന്ന യാത്രക്കാരനിൽ നിന്നും കൊച്ചി കസ്റ്റംസ് പ്രിവന്റീവ് കമ്മിഷണറേറ്റിന്റെ കീഴിലുള്ള കോഴിക്കോട് കസ്റ്റംസ് പ്രിവന്റീവ് ഡിറ്റാച്മെന്റാണ് സ്വർണം പിടികൂടിയത്.
കരിപ്പൂർ വിമാനത്താവളത്തിൽ ഈ മാസം ആദ്യം ചവറ്റുകുട്ടയിൽ ഉപേക്ഷിച്ച നിലയിൽ ഒന്നരകോടിയോളം രൂപയുടെ സ്വർണമിശ്രിതം കണ്ടെടുത്തിരുന്നു. 1.7 കിലോ സ്വർണമിശ്രിതത്തിൽ നിന്ന് ഒന്നര കിലോ സ്വർണം വേർതിരിച്ചിരുന്നു. കൊണ്ടുവന്നയാൾ സ്വർണം പിടികൂടുമെന്നായപ്പോൾ ഉപേക്ഷിച്ചതാകാമെന്നാണ് നിഗമനം. ഈ സംഭവത്തെ കുറിച്ചുള്ള അന്വേഷണം നടന്നുവരികയാണ്.
