ഈ വരാനിരിക്കുന്ന നിയമസഭാ തിരഞ്ഞെടുപ്പിൽ കെ.ബി ഗണേഷ് കുമാറിന് വോട്ട് ചെയ്യണമെന്ന് കോൺഗ്രസ് നേതാവിൻ്റെ ആഹ്വാനം. കൊല്ലം വെട്ടിക്കവല ഗ്രാമപഞ്ചായത്ത് പ്രസിഡന്റ് അബ്ദുൽ അസീസ് ആണ് പൊതു പരിപാടിയിൽ അദ്ദേഹത്തിനുവേണ്ടി വോട്ട് അഭ്യർത്ഥന നടത്തിയത്. ജാതി നോക്കാതെ, മതം നോക്കാതെ, വർണ്ണം നോക്കാതെ, വർഗ്ഗം നോക്കാതെ നമ്മുടെ നാട്ടിൽ വികസനം ചെയ്യുന്ന നേതാവാണ് ഗണേഷ്കുമാർ എന്നും അദ്ദേഹം വേദിയിൽ പറഞ്ഞു. അദ്ദേഹത്തെ മഹാഭൂരിപക്ഷത്തോടുകൂടി വിജയിപ്പിച്ച് വീണ്ടും നമ്മുടെ മന്ത്രിയാക്കുവാൻ എല്ലാവരും തയ്യാറാകണമെന്ന് അബ്ദുൽ അസീസ് പറഞ്ഞു.
“നാട്ടുഭാഷയിൽ പറഞ്ഞാൽ..ഫലം കായ്ക്കാത്ത മച്ചിമരങ്ങളും ഇവിടേക്ക് കടന്നുവരും. അത് പൂക്കില്ല, അത് കായ്ക്കില്ല. അത് മച്ചിമരമാണ് എന്ന് തിരിച്ചറിഞ്ഞുകൊണ്ട് നമ്മുടെ പ്രിയപ്പെട്ട നേതാവിനെ വിജയിപ്പിക്കാൻ എല്ലാവരും മുന്നോട്ട് വരണം. താനും ജനങ്ങളോടൊപ്പം കാണും”- അദ്ദേഹം പറഞ്ഞു.
മന്ത്രിയുമായി തനിക്ക് ബാലകൃഷ്ണ സാർ തൊട്ടിങ്ങോട്ട് അഭേദ്യമായ ബന്ധമുണ്ടെന്നും, ആ ബന്ധം ഇന്നും മന്ത്രിയുടെ മുന്നിൽ കാത്തുസൂക്ഷിച്ചുകൊണ്ട് പിരിയാതെ മുന്നോട്ടുപോവുകയാണെന്നും അദ്ദേഹം കൂട്ടിച്ചേർത്തു.
