വനപ്രദേശങ്ങളിലും നാട്ടിൻപുറങ്ങളിലും വിലസിനടക്കുന്ന ഈ സുന്ദര ശലഭത്തിന് ഇതിലും ചേർച്ചയുള്ള വേറൊരു പേരില്ല, ‘വിലാസിനി’… ചുവന്ന പൊട്ടുകളുള്ള ബോർഡറോടുകൂടിയ സാരി അണിഞ്ഞതുപോലെ ആണ് ഇവരെ കണ്ടാൽ തോന്നുക.
ശത്രുവിനെ കാണുമ്പോൾ ചത്തതുപോലെ കിടക്കും. അവർ പോയാൽ ഉടൻ ചാടി എണീറ്റ് പറന്നങ്ങ് പോകും. വിലാസിനി ചിത്രശലഭത്തിന്റെ ഒരു ട്രിക്കാണിത്. അതിമനോഹരമായ ഒരു ചിത്രശലഭമാണ് ‘വിലാസിനി’ (Common jezebel). മഞ്ഞയും ചുവപ്പും വെള്ളയും കറുപ്പും നീലയും നിറങ്ങളിൽ വിവിധ ആകൃതിയിലുള്ള പാടുകൾ ഈ ചിത്രശലഭത്തിന്റെ ചിറകിലുണ്ട്
ചിറകുകൾ വിടർത്തുമ്പോൾ വെളുപ്പോ ഇളംനീലയോ ആയിരിക്കും. വളരെ സാവധാനത്തിലാണ് ഇവ പറക്കുക. ഇത്തിൾക്കണ്ണികളിലാണ് മുട്ടയിടുന്നത്. ചെറിയ വിഷം ഉള്ളതിനാൽ സാധാരണ ഇരപിടിയന്മാർ ഇവയെ ഒഴിവാക്കാറാണ് പതിവ്. അതിനാൽ, വിഷമില്ലാത്ത ചിത്രശലഭമായ ‘ചോലവിലാസിനി’ (പൈന്റഡ് സൗടൂത്ത) ഇവയുടെ രൂപമനുകരിച്ച് എസ്കേപ്പാവാറുണ്ട്. ഇന്ത്യ, ശ്രീലങ്ക, മ്യാൻമാർ, തായ്ലാൻഡ് തുടങ്ങിയ രാജ്യങ്ങളിലാണ് ഇവയെ സാധാരണ കണ്ടുവരുന്നത്. കേരളത്തിലെ ഒട്ടുമിക്ക പ്രദേശങ്ങളിലും ഇവയെ കാണാം.
