മലയാള സിനിമയിൽ വില്ലൻ വേഷങ്ങളിലൂടെ മനസ്സില്‍ സ്ഥാനം പിടിച്ച താരമാണ് ബൈജു എഴുപുന്ന. സംവിധായകൻ കൂടിയായ ഇദ്ദേഹത്തിന്റെ മകള്‍ അനീറ്റയുടെ വിവാഹനിശ്ചയമായിരുന്നു കഴിഞ്ഞദിവസം. ഇപ്പോഴിതാ ഇവിടെ നിന്നുള്ള വീഡിയോകളും ദ്യശ്യങ്ങളുമാണ് സോഷ്യല്‍ മീഡിയയില്‍ വൈറലാകുന്നത്.
ഇതില്‍ കൂടുതൽ വൈറലായത് മെഗാസറ്റാർ മമ്മൂട്ടിയുടെ മാസ് എൻട്രിയായിരുന്നു. വിവാഹനിശ്ചയത്തിനിടെ അപ്രതീക്ഷിതമായെത്തിയ അതിഥിയെ കണ്ട് ഞെട്ടിയ കുടുംബത്തിന്റെ വീഡിയോ സോഷ്യല്‍ മീഡിയയില്‍ വൈറലായിരുന്നു. നിർമാതാവ് ആന്റോ ജോസഫിനൊപ്പം ചടങ്ങിനെത്തിയ മമ്മൂട്ടി വധൂവരന്മാരെ ആശീർവദിച്ചു.
രമേശ് പിഷാരടി, ആന്റോ ജോസഫ്, ടിനി ടോം, ബാല, അബു സലിം, ലിസ്റ്റിൻ സ്റ്റീഫൻ, ഷീലു എബ്രഹാം തുടങ്ങി സിനിമാ രംഗത്തെ പ്രമുഖർ വിവാഹ നിശ്ചയത്തിന് അതിഥികളായി എത്തി. മന്ത്രി പി പ്രസാദും ചടങ്ങിനെത്തിയിരുന്നു.
ബൈജുവിന്റെ കുടുംബവുമായി ഏറെ അടുത്തബന്ധമുള്ളവരാണ് തങ്ങള്‍, അതുകൊണ്ടുതന്നെ സെലിബ്രിറ്റി ആയിട്ടല്ല ഇവിടെ നില്‍ക്കുന്നത്. സ്ഥിരമായി ഭക്ഷണം കഴിക്കുന്ന വീടാണിത്. ബൈജു ചേട്ടന്റെ മകളുടെ വിവാഹമായെന്ന് ചിന്തിക്കാൻ പറ്റുന്നില്ല. സിനിമയുടെ തുടക്കകാലം മുതല്‍ കാണുന്ന മുഖമാണ് അദ്ദേഹത്തിന്റേതെന്നും ടിനി ടോം പറഞ്ഞു.
ബാലയുടെ വാക്കുകള്‍ ഇങ്ങനെ – ”എന്നെ ഒരുപാട് ഇഷ്ടപ്പെടുന്ന ആളാണ് ബൈജു ചേട്ടൻ. ശരിക്കുമുള്ള സൗഹൃദം എന്തെന്ന് മനസ്സിലാക്കി തന്ന ഒരാള് കൂടിയാണ് ബൈജു എഴുപുന്ന. ഞാനിന്ന് പളളിയില്‍ പോയി ബൈജു ചേട്ടനും കുടുംബത്തിനും വേണ്ടി പ്രാർഥിച്ചു. ഇങ്ങനെയൊരു വേദിയില്‍ എന്നെയും ക്ഷണിച്ചതില്‍ വളരെ സന്തോഷമുണ്ട്.”
