നവജാത ശിശുവിന് നൽകിയ കുത്തിവയ്പ്പിൽ അപാകതയെന്ന പരാതിയുമായി കുട്ടിയുടെ പിതാവ് ബാലേശ്വർ ഭാട്ടി പൊലീസിൽ പരാതി നൽകി. ഉത്തർപ്രദേശിലാണ് സംഭവം. ഈ മാസം 5ന് ജനിച്ച കുഞ്ഞിന്റെ ആരോഗ്യം മോശമായതിനെ തുടർന്ന് ഗ്രേറ്റർ നോയിഡയിലെ നഴ്സിങ് ഹോമിൽ പ്രവേശിപ്പിച്ചു. എന്നാൽ കുത്തിവയ്പ്പ് നൽകിയ ശേഷം കുഞ്ഞിന്റെ കൈ നീരുവച്ച് വീർക്കുകയും നീല നിറമാവുകയും ചെയ്തു.
കുഞ്ഞിന്റെ നില വഷളായപ്പോൾ നഴ്സിങ് ഹോമിലെ ജീവനക്കാരുടെ നിർദേശപ്രകാരം മറ്റൊരു ആശുപത്രിയിലേക്ക് മാറ്റി. എന്നാൽ ആരോഗ്യനിലയിൽ മാറ്റമില്ലാത്തതിനെ തുടർന്ന് വീണ്ടും മറ്റൊരു ആശുപത്രിയിൽ പ്രവേശിപ്പിച്ചു.
കുഞ്ഞിന്റെ കൈ അഴുകി തുടങ്ങിയതിനാൽ കൈ മുറിച്ചുമാറ്റാൻ സാധ്യതയുണ്ടെന്നാണ് വിവരം.
