സ്ഥിരമായി മദ്യപിക്കുന്നവർക്ക് പെട്ടെന്ന് മദ്യം ഉപേക്ഷിക്കാൻ വലിയ ബുദ്ധിമുട്ടായിരിക്കും. എന്നാല്‍ അങ്ങനെ ഒരു തീരുമാനമെടുത്താല്‍ നിങ്ങളുടെ ആരോഗ്യത്തില്‍ ഒരുപാട് മാറ്റങ്ങളുണ്ടാകും. ഒരു മാസം നിങ്ങള്‍ മദ്യപിക്കാതിരുന്നാല്‍ നിങ്ങളുടെ ശരീരത്തില്‍ എന്തൊക്കെ മാറ്റങ്ങളുണ്ടാകുമെന്ന് ചിന്തിച്ചിട്ടുണ്ടോ? ഒരു വ്യക്തി എത്ര മദ്യപിക്കുന്നു എന്നതിനെ അടിസ്ഥാനമാക്കിയാകും ലഭിക്കുന്ന ആരോഗ്യ നേട്ടങ്ങള്‍. 30 ദിവസം മദ്യപാനം ഒഴിവാക്കിയാൽ നിങ്ങളുടെ ശരീരത്തിനുണ്ടാകുന്ന മാറ്റങ്ങള്‍ എന്തൊക്കെയാണെന്ന് നോക്കാം..
കരളിന്റെ പ്രവർത്തനം
മിതമായും അമിതമായും മദ്യപിക്കുന്നവർക്കും കരള്‍രോഗം പിടിപെടാനുള്ള സാദ്ധ്യത ഏറെയാണ്. മദ്യപിക്കുന്നത് നിർത്തിയാല്‍ കരളിന് ഉണ്ടാകുന്ന ക്ഷതം മാറി ഏതാനും ആഴ്ചകള്‍ കൊണ്ട് കരള്‍ പഴയ അവസ്ഥയിലേക്ക് ആകും.
ക്യാൻസർ സാദ്ധ്യത കുറയ്ക്കുന്നു
മദ്യപാനികളില്‍ ക്യാൻസർ സാദ്ധ്യത കൂടുതലാണെന്നാണ് പഠനങ്ങളില്‍ പറയുന്നത്. ഒട്ടേറെ ക്യാൻസറുകള്‍ മദ്യപാനം മൂലം സംഭവിക്കാം. അന്നനാളത്തിലെ ക്യാൻസർ, കരള്‍, മലാശയം, കഴുത്ത്, സ്തനം എന്നിവിടങ്ങളിലെ ക്യാൻസർ സാദ്ധ്യത കൂട്ടുന്ന ഒന്നാണ് മദ്യപാനം. മദ്യം ഉപേക്ഷിച്ചാല്‍ ക്യാൻസർ സാദ്ധ്യതയും കുറയും.
ഹൃദയാരോഗ്യം
മദ്യപാനികളുടെ ശരീരത്തില്‍ ചീത്ത കൊളസ്‌ട്രോള്‍ വർദ്ധിക്കും. ഇത് ഹൃദയദമനികളില്‍ തടസം ഉണ്ടാക്കി ഹൃദ്രോഗത്തിന് കാരണമായേക്കും. മദ്യം ഉപേക്ഷിച്ചാല്‍ നല്ല കൊളസ്‌ട്രോള്‍ കൂടുകയും ഹൃദയാരോഗ്യം മെച്ചപ്പെടുകയും ചെയ്യും.
ശരീരഭാരം കുറയ്ക്കുന്നു
ഏതുതരം മദ്യത്തിലും കാലറി കൂടുതലായിരിക്കും. അതുകൊണ്ട് തന്നെ ശരീരഭാരം കൂടാൻ കാരണമാകും. മദ്യം ഉപേക്ഷിക്കുകയാണെങ്കില്‍ അമിതഭാരം കുറയും. മാത്രമല്ല വയറിലെ കൊഴുപ്പ് കുറയ്ക്കുന്നത് മൂലം വയറു ചാടുന്നത് കുറയ്ക്കാൻ സഹായിക്കും. മദ്യപാനം നിർത്തിയാല്‍ നിങ്ങള്‍ മികച്ച ശരീരസൗന്ദര്യം ഉണ്ടാക്കിയെടുക്കാൻ സഹായിക്കും.
ഓർമ്മശക്തി
അമിതമായ മദ്യപാനം നമ്മുടെ ഓർമ്മശക്തിയെ കാര്യമായി ബാധിക്കും. മദ്യപാനികളില്‍ മിക്കവർക്കും തലച്ചോറിന് നാശം സംഭവിക്കുകയും മറവി പ്രശ്നങ്ങള്‍ ഉണ്ടാകുകയും ചെയ്യും. മദ്യപിക്കുന്നത് നിർത്തിയാല്‍ ഈ പ്രശ്നത്തിന് ഒരു പരിധിവരെ പരിഹരാമുണ്ടാകും. മദ്യപിക്കുന്നവരുടെ തലച്ചോറില്‍ ഡോപമിന്റെ അളവ് വളരെ കൂടും. അതുകൊണ്ട് പെട്ടെന്ന് മദ്യം ഉപേക്ഷിക്കുമ്ബോള്‍ ഡോപമിന്റെ അഭാവം ഉണ്ടാകുകയും ഒരു നിരാശ ആദ്യം ഉണ്ടാകുകയും ചെയ്യും.
മദ്യപാനം ഒഴിവാക്കാന്‍ ശ്രമിക്കുമ്പോള്‍
മദ്യപാനം ഒഴിവാക്കാൻ ശ്രമിക്കുന്നത് മൂലം ശരീരം പ്രകടിപ്പിക്കുന്ന പിന്‍വലിയല്‍ ലക്ഷണങ്ങളെയും ആസക്തിയെയും എതിര്‍ത്ത്‌ തോല്‍പ്പിക്കല്‍ അത്ര എളുപ്പമല്ല. എന്നാൽ, സാധ്യമാണ്‌. ശരീരത്തിന്റെ ജലാംശം നിലനിര്‍ത്താന്‍ വെള്ളവും കരിക്കിന്‍ വെള്ളവും ജ്യൂസും ഉള്‍പ്പെടെ ആരോഗ്യകരമായ പാനീയങ്ങള്‍ കുടിക്കേണ്ടതാണ്‌. ആഘോഷ വേളയിൽ മദ്യത്തിന്‌ പകരം പഴച്ചാറുകളും മോക്ടെയ്‌ലുകളും ആകാം. പോഷകസമ്പുഷ്ടമായ ഭക്ഷണവും കഴിക്കേണ്ടതാണ്‌. ആസക്തി മറികടക്കാന്‍ മനസ്സിനെ ആകര്‍ഷിക്കുന്ന പുതിയൊരു ഹോബി ആരംഭിക്കാവുന്നതാണ്‌. പ്രചോദനത്തിനും പിന്തുണയ്‌ക്കും അഭ്യുദയകാംക്ഷികളായ സുഹൃത്തുക്കളുടെയും കുടുംബാംഗങ്ങളുടെയും ബന്ധുക്കളുടെയും സഹായം തേടാവുന്നതാണ്‌.
