ചർമ്മ സൗന്ദര്യത്തിൽ പല തരത്തിലുള്ള ഘടകങ്ങൾ വളരെ പ്രധാനമാണ്. അതിൽ ചർമ്മത്തിന് വളരെ പ്രധാനപ്പെട്ടതും ആവശ്യമുള്ളതുമായ ഒരു ആന്റി ഓക്സിഡൻ്റാണ് ഗ്ലൂട്ടാത്തയോൺ. എന്നാൽ പ്രായമാകുന്നതിനനുസരിച്ച് ഇത് കുറയാനുള്ള സാധ്യത വളരെ കൂടുതലാണ്.
രോഗങ്ങളിൽ നിന്ന് ശരീരത്തെ സംരക്ഷിക്കുക, കാൻസർ കോശങ്ങളുടെ വളർച്ചയെ തടയുക, ഇൻസുലിൻ സംവേദനക്ഷമത മെച്ചപ്പെടുത്തുക തുടങ്ങിയ പല തരത്തിലുള്ള ഗുണങ്ങൾ ഇതിന് അടങ്ങിയിട്ടുണ്ട്. അതുപോലെ ചർമ്മത്തിനും വളരെ നല്ലതാണ് ഗ്ലൂട്ടാത്തയോൺ. പ്രായമാകുന്നത് അനുസരിച്ച് ശരീരത്തിൽ ഈ ഗ്ലൂട്ടത്തയോൺ ഉത്പ്പാദിപ്പിക്കുന്നത് സ്വാഭാവികമായും കുറയുന്നു. ഈ സാഹചര്യത്തിൽ ഡയറ്റിലൂടെയും മറ്റും ഇത് കൂട്ടേണ്ടത് വളരെ പ്രധാനമാണ്. ഇത് വേഗത്തിൽ കൂട്ടാൻ സഹായിക്കുന്ന വളരെ എളുപ്പമുള്ള ഒരു ഗ്ലൂട്ടാത്തയോൺ ഡ്രിങ്ക് എങ്ങനെ ഉണ്ടാക്കാം എന്ന് നോക്കാം :-
പപ്പായ
നമ്മുടെ എല്ലാ വീടുകളിലും സുലഭമായി കണ്ടുവരുന്ന ഒന്നാണ് പപ്പായ. ഇത് വെറുതെ കളായിതിരുന്നാൽ ചർമ്മത്തിൽ പല ഗുണങ്ങളും ലഭിക്കും. പപ്പായയിലെ ഉയർന്ന ജലാംശം ഇതിനെ മികച്ച പ്രകൃതിദത്ത മോയ്സ്ചറൈസറാക്കി മാറ്റുന്നു. ഇത് ചർമ്മത്തെ മൃദുവാക്കാനും നന്നായി ജലാംശം നിലനിർത്താനും ഏറെ സഹായിക്കുന്നു. ഇതിൽ അടങ്ങിയിരിക്കുന് പപ്പൈൻ നാച്യുറൽ എക്സ്ഫോളിയേറ്ററായി പ്രവർത്തിക്കാറുണ്ട്. മൃതകോശങ്ങളെ പുറന്തള്ളി വേഗത്തിൽ ചർമ്മത്തെ പുനരുജ്ജീവിപ്പിക്കുന്നു. പതിവ് ഉപയോഗം വരൾച്ചയും തൊലി അടർന്ന് പോകുന്നത് പോലെയുള്ള പ്രശ്നങ്ങളും മാറ്റി ആരോഗ്യകരമായ നിറം നൽകാൻ മികച്ചതാണ്.
ക്യാരറ്റ്
കണ്ണിന് ഏറെ നല്ലതാണ് ക്യാരറ്റെന്ന് നമുക്ക് എല്ലാവർക്കുമറിയാവുന്നകാര്യമാണ്. അതുപോലെതന്നെ ചർമ്മത്തിനും ഇത് വളരെ നല്ലതാണ്. ഇതിലെ ആൻ്റിഓക്സിഡൻ്റായ ബീറ്റാ കരോട്ടിൻ ചർമ്മത്തെ സൂര്യതാപത്തിൽ നിന്ന് സംരക്ഷിക്കാനും ഇലാസ്തികത, ജലാംശം, ഘടന, ചുളിവുകൾ, പ്രായത്തിൻ്റെ പാടുകൾ എന്നിവയെ ഇല്ലാതാക്കി ചർമ്മത്തിൻ്റെ വാർദ്ധക്യത്തെ മന്ദഗതിയിലാക്കാനും സഹായിക്കും. ക്യാരറ്റിലെ വൈറ്റമിൻ സി ചർമ്മത്തിൻ്റെ ആരോഗ്യം വർദ്ധിപ്പിക്കുന്നതിന് പ്രധാനമാണ്. വരണ്ട ചർമ്മമുള്ളവർക്ക് ഇത് ഏറെ നല്ലതാണ്.
ബീറ്റ്റൂട്ട്
നമ്മുടെ ആരോഗ്യത്തിനും അതുപോലെ ചർമ്മത്തിനും വളരെ നല്ലതാണ് ബീറ്റ്റൂട്ട്. ചുണ്ടുകളും ചർമ്മത്തിനുമൊക്കെ വേഗത്തിൽ നിറം വയ്ക്കാൻ ബീറ്റ്റൂട്ട് സഹായിക്കും. പ്രായമാകുന്നതിൻ്റെ ലക്ഷണങ്ങളെ തടയാൻ ബീറ്റ്റൂട്ട് നല്ലതാണ്. ആൻ്റി ഓക്സിഡൻ്റുകൾ ധാരാളമായി അടങ്ങിയിരിക്കുന്നതിനാൽ ഫ്രീ റാഡിക്കലുകൾ മൂലമുണ്ടാകുന്ന ചർമ്മത്തിൻ്റെ പ്രശ്നങ്ങളെ ഇത് അകറ്റും. പ്രായമാകുന്നതിൻ്റെ വരകളും ചുളിവുകളുമൊക്കെ മാറ്റാൻ ഇത് വളരെ നല്ലതാണ്. ഇതിലുള്ള വൈറ്റമിൻ സിയും ഇയും ചർമ്മത്തെ പുനരുജ്ജീവിപ്പിക്കാൻ വളരെയധികം സഹായിക്കുന്നതാണ്. അതുപോലെ ചർമ്മത്തിന് വേണ്ട ജലാംശവും ഇത് നൽകുന്നു.
മാതളം
ആരോഗ്യത്തിനൊപ്പം ചർമ്മത്തിനും ഗുണം നൽകുന്ന ഒരു ഫലമാണ് മാതളം. ചർമ്മത്തിന് തിളക്കം നൽകാനും പുനരുജ്ജീവിപ്പിക്കാനും ഉള്ള കഴിവ് മാതളത്തിനുണ്ട്. ഇതിലെ ആൻ്റിഓക്സിഡൻ്റുകൾ ചർമ്മത്തിൻ്റെ മൊത്തത്തിലുള്ള ആരോഗ്യം പ്രോത്സാഹിപ്പിക്കുന്നു. പ്രായമാകുന്നതിൻ്റെ ലക്ഷണങ്ങളെ എല്ലാം ഇല്ലാതാക്കാനും അതുപോലെ ചർമ്മത്തിന് നല്ല ആരോഗ്യം നൽകാനും ഇത് സഹായിക്കും. രക്ത കുറവിന് ആളുകൾ ഏറ്റവും കൂടുതൽ കഴിക്കുന്ന ഒരു ഫലവുംകൂടിയാണിത്.
ചീര
ആരോഗ്യ ഗുണങ്ങളാൽ സമ്പുഷ്ടമാണ് ചീര. പ്രത്യേകിച്ച് നേത്രസംബന്ധമായ ഗുണങ്ങൾ. ഇതിലെ ആൻ്റി ഓക്സിഡൻ്റുകൾ ചർമ്മത്തിനും ആരോഗ്യത്തിനും പല തരത്തിലുള്ള ഗുണങ്ങളാണ് നൽകുന്നത്. ചീരയിലെ വൈറ്റമിൻ സി കൊളാജൻ ഉത്പാദിപ്പിക്കാൻ വളരെ പ്രധാനമാണ്. കൂടാതെ പുതിയ ചർമ്മ കോശങ്ങൾ ഉത്പാദിപ്പിക്കാൻ പ്രോട്ടീൻ ഉപയോഗിക്കുന്നു. ചർമ്മകോശങ്ങളെ പതിവായി പുനരുജ്ജീവിപ്പിക്കാൻ കഴിയുന്നില്ലെങ്കിൽ ചർമ്മം വരണ്ടതും അതുപോലെ ഭംഗിയില്ലാത്തതുമായി മാറുന്നത് സ്വാഭാവികമാണ്. ശരീരത്തിലുടനീളം ഓക്സിജൻ എത്തിക്കുന്ന ഹീമോഗ്ലോബിൻ്റെ ആവശ്യമായ ഘടകമായ ഇരുമ്പും ചീരയിൽ അടങ്ങിയിട്ടുണ്ട്.
ഡ്രിങ്ക് തയാറാക്കാൻ
ആദ്യം ബീറ്റ്റൂട്ടും ക്യാരറ്റും നന്നായി മിക്സിയിലിട്ട് അരയ്ക്കുക. ഇതിലേക്ക് പപ്പായ, ചീര, മാതളം എന്നിവയെല്ലാം ചേർത്ത് നന്നായി അരച്ച് എടുക്കുക. ആവശ്യത്തിന് വെള്ളമൊഴിച്ച് വേണം ഇത് അരയ്ക്കാൻ. അതിന് ശേഷം ഇത് ഒരു നല്ല തുണി ഉപയോഗിച്ച് അരിച്ച് എടുക്കുക. ഇനി ഇതിലേക്ക് അൽപ്പം നാരങ്ങ നീരും കുരുമുളകും ചേർക്കാവുന്നതാണ്. ചർമ്മത്തിന് തിളക്കം കൂട്ടാൻ ഇത് കുടിക്കാവുന്നതാണ്.
