തിരുവനന്തപുരം : വാണിജ്യ ആവശ്യത്തിനുള്ള ഗ്യാസ് സിലിണ്ടർ വില കുറച്ചു. ഏകദേശം 4.50 രൂപ മുതൽ 6.50 രൂപവരെയാണ് കുറച്ചത്. ഇതോടെ 19 കിലോ സിലിണ്ടറിന് 1599 രൂപയായി. സർക്കാർ ഉടമസ്ഥതയിലുള്ള ഓയിൽ മാർക്കറ്റിങ് കമ്പനികളാണ് (OMCs) കൊമേഴ്സ്യൽ എൽപിജി സിലിണ്ടറുകളുടെ വില കുറച്ചത്. വീടുകളിൽ ഉപയോഗിക്കുന്ന 14.2 കിലോഗ്രാം എൽപിജി സിലിണ്ടറുകളുടെ വിലയിൽ മാറ്റമില്ല.
കഴിഞ്ഞ മാസം പാചകവാതക വില സിലിണ്ടറിന് 16 രൂപ കൂട്ടിയിരുന്നു. പുതിയ വിലക്കുറവ് റെസ്റ്റോറന്റുകൾ, ഹോട്ടലുകൾ, കാറ്ററിങ് സേവനങ്ങൾ തുടങ്ങിയ വാണിജ്യ ആവശ്യങ്ങൾക്ക് ആശ്വാസം നൽകും. ഒക്ടോബറിൽ ഡൽഹിയിലും മുംബൈയിലും 15.50 രൂപയും കൊൽക്കത്തയിലും ചെന്നൈയിലും 16.50 രൂപയും കൂട്ടിയിരുന്നു.
രാജ്യതൽസ്ഥാനമായ ഡൽഹിയിൽ 19 കിലോഗ്രാം വാണിജ്യ എൽപിജി സിലിണ്ടറിന് 5 രൂപ കുറഞ്ഞ് 1,590.50 രൂപയായി. കഴിഞ്ഞ മാസം ഇത് 1,595.50 രൂപയായിരുന്നു. കൊൽക്കത്തയിൽ ഏറ്റവും കൂടുതൽ വില കുറഞ്ഞത് 6.50 രൂപയാണ്. അവിടെ ഇപ്പോൾ വില 1,694 രൂപയാണ്. കഴിഞ്ഞ മാസം ഇത് 1,700.50 രൂപയായിരുന്നു. മുംബൈയിൽ വില 5 രൂപ കുറഞ്ഞ് 1,542 രൂപയായി. കഴിഞ്ഞ മാസം ഇത് 1,547 രൂപയായിരുന്നു. ചെന്നൈയിൽ 4.50 രൂപ കുറഞ്ഞ് 1,750 രൂപയായി. ഒക്ടോബറിൽ ഇത് 1,754.50 രൂപയായിരുന്നു.
വീടുകളിൽ ഉപയോഗിക്കുന്ന 14.2 കിലോഗ്രാം എൽപിജി സിലിണ്ടറുകളുടെ വിലയിൽ ഈ മാസം മാറ്റമില്ല. ഡൽഹിയിൽ ഇപ്പോഴും 853 രൂപയാണ് വില. കൊൽക്കത്തയിൽ 879 രൂപയാണ്. മുംബൈയിൽ 852.50 രൂപയും ചെന്നൈയിൽ 868.50 രൂപയുമാണ് വില. വീടുകളിൽ ഉപയോഗിക്കുന്ന സിലിണ്ടറുകളുടെ വിലയിൽ കാര്യമായ മാറ്റം വരുത്തിയിട്ടില്ല.
എൽപിജി വിലയിലെ ഈ മാറ്റങ്ങൾ ഭക്ഷ്യ വിതരണ രംഗത്ത് പ്രവർത്തിക്കുന്ന ചെറുകിട, ഇടത്തരം സംരംഭങ്ങൾക്ക് ഗുണകരമാകും. എൽപിജി വില നിർണയം അന്താരാഷ്ട്ര വിപണിയിലെ ക്രൂഡ് ഓയിൽ വില, വിനിമയ നിരക്ക്, മറ്റ് ഘടകങ്ങൾ എന്നിവയെ ആശ്രയിച്ചിരിക്കുന്നതാണ്. അതിനാൽ, ഈ വിലക്കുറവ് എത്രത്തോളം കാലം നിലനിൽക്കുമെന്ന് കണ്ടറിയേണ്ടതുണ്ട്. എങ്കിലും നിലവിൽ ഈ വിലക്കുറവ് കൊമേഴ്സ്യൽ ഉപഭോക്താക്കൾക്ക് ഒരു സന്തോഷവാർത്തയാണ്.
